Нұрлан Жақыпов Зимбабве әл-ауқат қорының инвестициялар жөніндегі директорымен кездесті

Тараптар екі инвестициялық әл-ауқат қоры арасындағы ынтымақтастық перспективаларын, оның ішінде мемлекеттік активтерді басқару, инвестициялар және портфельдік басқару салаларындағы тәжірибе алмасу мәселелерін талқылады. Нұрлан Жақыпов «Самұрық-Қазынаның» қызметі, оның Қазақстан экономикасындағы рөлі және ұлттық компаниялар портфелін басқару тәсілдері туралы айтты.

Корпоративтік басқару, тиімділікті арттыру және жеке капиталды тарту саласындағы тәжірибеге ерекше назар аударылды. Қордың шетелдік ұлттық әл-ауқат қорларымен институционалдық тәжірибе алмасу бағытында да тәжірибесі бар екені айтылды.

Бұған дейін Azerbaijan Investment Holding және Моңғолияның Chinggis Khaan Sovereign Wealth Fund өкілдері «Самұрық-Қазынаның» тәжірибесін зерттеу мақсатында қорға келген еді.

Mutapa Investment Fund — Зимбабвенің ұлттық әл-ауқат қоры. Қор елдің стратегиялық инвестициялық құралы ретінде мемлекеттік компаниялар мен инвестициялар портфелін басқарады.